→Verde oliva

«Xavier Alcalá conta na súa nova novela as aventuras e desventuras de Mariana, a galega enguedellada nunha revolución mítica contra o tirano que sometera a illa de Cuba. Velaquí Verde oliva, a historia desta filla de galego e crioula que se integra nunha rede secreta de axentes encargados de destruír o réxime do ditador.

A heroína de Verde oliva puido nacer en Cuba e criarse alí, desde sempre no ambiente que conduciría á rebelión contra Batista, mais, por cousa dos azares da vida, veu ao mundo nunha aldea da Mariña luguesa o 20 de xullo de 1936. Así e todo, aos catorce anos desembarcaba no porto da Habana. Co mester do narrador experto, Xavier Alcalá conta a historia desta loitadora pola liberdade que, educada nun mundo burgués, intervén na guerra secreta desenvolvida durante a revolución cubana.

Mariana, a protagonista da novela, chega á Habana e, mergullada nos hábitos de cidade avanzada, recibe boa educación e participa do luxo dos que se permiten vivir en Tarará. O seu pai, republicano en Galicia, imbúelle ideas democráticas que baten coa ditadura de Batista; isto, xunto co ambiente do seu colexio e da academia de xornalismo á que asiste, lévana a participar no Movemento 26J.» [Editorial Galaxia]

«[…] Durante dous anos avanzou a historia de Juana mentres avanzaban as obras da autovía Transcantábrica. Eu vivía entre Coruña e Bruxelas, e Juana non quere tratos coa telemática. Falabamos por teléfono, mandábame documentos; ía visitala e tomaba notas do que ela me relataba no seu galego melodioso, salpicado de cubanismos. Eu pedíalle comprobacións e ela realizábaas. Juana Maseda Samartín sabe como conectar con persoas capaces de lembrar a Historia negada desde A Habana a partir do peche da revista Bohemia, que tanto tiña axudado a revolución […]» [Revista Qué leer]